Se Premye minis peyi Bahamas la, Philip Davis, ki fè anons sa mèkredi 28 fevriye 2024 la pandan somè a ap fèmen diskisyon yo te genyen nan kad 46è rankont chèf Leta Karayib yo. Premye minis ayisyen an ki nan tèt peyi a depi 30 mwa, Ariel Henry, pwomèt pou l òganize eleksyon jeneral yo nan mwa out 2025 la.
Pandan lari a kontinye gen gwo mouvman pwotestasyon kont pouvwa an plas la, pandan akò 21 desanm ki te fikse manda PM nan pou 7 fevriye 2024 sa rive nan bout li, chèf Primati a gen wout devan l toujou pou l woule. Daprè Premye minis peyi Bahamas la, Philip Davis, newochirijyen an ta dwe ki te tèt gouvènman ayisyen jouk aprè eleksyon jeneral yo k ap gen pou fèt pou pi ta 30 out 2025.
Daprè reprezantan Bahamas la, se yon gwo pa enpòtan peyi Dayiti fè pou l tounen nan konstitisyon l la. Nan sans sa li envite tout fòs viv nasyon an mete tèt yo ansanm pou yo soti peyi a nan twou li twouve l jodi a. Daprè chèf gouvènman Bahamas la ki t ap patisipe nan rankont chèf Leta peyi Karayib yo, yon ekip k ap genyen manm Nasyonzini, Etazini, Kanada ak Òganizasyon Leta ameriken yo (OEA), ap gen pou rann yo sou ti bout tè Dessalines nan pou evalye sitiyasyon yo avan eleksyon epi bay yon kout men nan pwosesis la tou.
Pandan tan sa, jedi 29 fevriye a Ariel Henry rive nan peyi Kenya nan lide pou chèf gouvènman ayisyen an finalize deplwaman fòs etranjè a nan peyi a. Eske Ariel pral fè 4 kan sou pouvwa san manda?
Carl Henry Florant
