Pou make premye anivèsè lanmò Prezidan Jovenel Moïse, jedi 7 jiyè 2022 sa a, Premye Minis Ariel Henry, manm kabinè ministeryèl la, kòmandman Polis Nasyonal Dayiti a, kòmandman fòs lame Dayiti ak kèk manm kò diplomatik la te asiste seremoni pou komemore lanmò ansyen Prezidan Jovenel Moïse nan jaden Mize Panteyon Nasyonal Dayiti (MUPANAH).
Chèf Gouvènman an nan diskou li a renouvle detèminasyon l pou l ankouraje san pran souf pouswit ankèt sou asasina ansyen Prezidan Jovenel Moïse. E pou kontinye ankèt la jous li rive nan bout li, Premye minis la toujou nan diskou li pou okazyon an di lajistis ayisyen an ka konte sou sipò gouvènman li ap dirije a.
«Jovenel MOÏSE tonbe. An nou pran tout sa ki te bon lakay li. An nou ranmase rèv li yo. Nou tout ansanm, an nou travay pou byennèt peyi a ak tout pitit li yo san distenksyon. Ayisyen andedan tankou sa kap viv lòt bò dlo, an nou travay men nan men, pou rekonsilye nation an ak tout piti li yo.» se kèk mo PM nan te lanse pou okazyon an.
Li enpòtan tou poun raple nan ankèt sou asasinay ansyen prezidan an, envestigasyon jidisyè yo te souliye kèk eleman ki ta montre patisipasyon Chèf gouvènman ayisyen an, Doktè Ariel Henry nan planifikasyon konplo sa a ak lyen sere li genyen ak youn nan sispèk asasina Prezidan Jovenel Moïse nan lannuit 6 pou rive 7 jiyè 2022 a.
