Nan okazyon premye ane li depil ap dirije peyi a, Premye Minis Ariel Henry te deside adrese nasyon an. Sekirite, dyalòg, eleksyon, disponiblite gaz la yo se pami kèk dosye ak lòt ankò chéf Primati a te deside abòde. Nan yon videyo ki te anrejistre epi difize sou plizyè platfòm, chèf gouvènman an pa chwazi fè bilan sou premye ane li nan tèt pouvwa. Li te pito abòde kèk aspè nan misyon li te fikse tèt li pandan li mete aksan sou kèk aksyon gouvènman l lan te jije efikas.
Depi kèk tan, kriz gaz la vin pi rèd. Li difisil pou fè gaz nan ponp yo, pandan tan sa pwodi a disponib bò lari yo nan pri tèt nèg. Pou Premye Minis la, pwoblèm sa a dwe abòde nan nivo sibvansyon an. “Ak varyasyon monte gaz la sou mache mondyal la, se yon efò ke nou pral fé piti piti poun monte pri pwodui petwòl yo”, se sa chèf egzekitif la te deklare nan diskou li. “Se nan kondisyon sa a ke nou pral kapab enpòte gaz la epi fè li disponib pou tout tan.” Daprè li, pèp la te montre matirite nan fen ane pase lè gouvènman an te monte pri pwodwi gaz la, kidonk diminye sibvansyon leta.
Anplis de sa, chèf gouvènman an pwomèt yon lòt fwa ankò pou l goumen kont ensekirite k ap frape peyi a. Gwo enkyetid konpatriyòt nou yo se reprann klima sekirite a”, Ariel Henry admèt epi souliye efò ofisye lapolis yo fè ak rezilta yo deja jwenn. Batay kont ensekirite ak retabli lapè ak libète pou moun ak machandiz deplase yo dwe pase anba yon kontwòl solid nan pò ak fwontyè. Ariel Henry te tou pwofite poul salye efò ki te fèt nan sezi zam ak bal yo te anrejistre nan Pòdepè ak Pòtoprens e li pwomèt pou l pwolonje aksyon li nan tout peyi a.
