Depi plizyè jou kout zam otomatik ap chante nan plizyè kwen nan zòn metropolitèn Pòtiprens lan: Bèlè, Delma 30 ak 32, Nazon, Solino, se kèk pami plizyè katye kote nèg ak zam pran an otaj pandan tout semèn nan. Yon sitiyasyon tansyon ki lage popilasyon zòn sa yo de bra pandye.
Nan fen jounen jedi 2 mas 2023 a, nèg ak zam yo anvayi zòn nou site yo ak plizyè, devan sitiyasyon malouk sa rezidan nan katye sa yo oblije kite kay yo pou al refijye yo lòt kote. Pou kounya poko gen okenn bilan ofisyèl sou kantite viktim nan afwontman sa yo, men selon plizyè sous gen plizyè moun ki blese ak bal nan batay gang yo.
Kredi foto: Ted Actu
Anpil moun kidnape, san pa sispann koule
Nan menm Semèn sa ankò selon plizyè gen plis pase yon ventèn moun ka kidnapping yo konte nan Pòtoprens. Pami moun sa yo, bandi kidnappe jedi 2 mas la nan zòn “Turgeau” avoka Menson Henry ansanm ak pitit fi li. Maten vandredi 3 mas la nan komin Pòtoprens nèg ak zam yo kidnape enspektè jeneral Frantz Sébastien Jean-Charles ak tout piti fiy li.
Yon lòt bò, nan sware jedi 2 mas la nan zón “Canapé-vert” bandi ki te nan yon “Nissan Patròl” blan atake machin Komisè Pòtoprens lan, Luckner Dumont. Viktim nan ki te soti blese nan atak sa ap pran swen lopital. Genyen tou Ralph Théodore tout moun konnen sou non “Sexy” ki mouri byen bonè nan maten vandredi 3 mas la anbal bal nan blòk Nazon.
Prèske tout katye nan zòn metropolitèn Pòtoprens lan chaje ak gwoup gang, nèg ak zam yo kontinye ap vale teren, chak jou ki jou yo touye, kidnape jan yo vle jan yo pito. Selon yon rapò OCNH rann piblik jedi 2 mas la, se anviwon 55 moun ki pèdi lavi yo anba bal pandan mwa fevriye a sèlman. Devan kriz san parèy sa, lapolis montre li pa kapab, men tou otorite yo nan pi wo nivo leta kontinye kenbe silans yo, popilasyon an li menm pa konn ki sen poul rele.
