Ekip feminen Olympique Lyonnais a bat Bordeaux (4-0) nan kad twazyèm jounen D1 Arkema. Ayisyèn nan Melchie Dumornay ki te titilè nan match sa make premye gòl li ak OL nan chanpyona.
Alòske match la te 0-0, nan 24yèm minit Corventina ta pral enksri premye gòl match la aprè yon balon Lerond, gadyèn Bordeaux a, te devye epi Ayisyèn nan ki te prezan nan ti kare a mete balon an nan kan. Se premye gòl Dumornay nan chanpyona feminen Fransè a.
Nouvo nimewo 6 ekip OL la te desizif tou sou 4yèm gòl ekip li a, aprèl te pwovoke yon penalite, kapitèn nan W. Renard te transfòmel (86yèm). Nan match sa Dumornay te touche 85 balon, 86 % nan pas li yo te reyisi, li te genyen 7 sou 9 nan dyèl li yo epi li te reyisi tou 3 drib sou 4 li te tante. Bèl chif sa ta pral pèmèt sipèsta seleksyon nasyonal Ayiti a fini MVP match lan.
