Pou sèlman 2023 plis pase 5000 moun mouri ak bal, deklarasyon minis zafè etranjè ayisyen jean victor Geneus ki tap patisipe nan reyinyon konsèy sekirite nasyon zini an sou dosye deplwaman fòs miltinasyonal la.
Gen 1432 moun ki blese, 2951 ki viktim kidnaping toujou selon diplomat la ki drese yon tablo nwa kou lank sou sitiyasyon ensekirite an nan peyi dayiti. Pou Jean Victor Geneus chak jou ki pase san fòs sa a se yon jounen lanfè pou popilasyon an.
Tout peyi ki te pran lapawòl yo dakò se sèl deplwaman fòs sa ki ka kwape gang yo nan peyi Dayiti devan yon polis Nasyonal afebli.
Reprezantan peyi Japon an di peyi l pare pou bay 14 milyon dola pou ede fòs la ranpli misyonl, Shino Mitsouko pwomèt gwo sipò tou pou polis nasyonal la.
Reprezantan ameriken nan konsèy la kalifye ”katastrofik ”sitiyasyon peyi Dayiti, se prèske menm pozisyon an pou reprezantan Chinwa ki regrèt tou sektè politik la poko ka jwenn yon antant pou jwenn yon solisyon nan kriz politik la magre jefò peyi Caricom yo
Minis zafè etranjè domiken an Roberto Alvarez kritike trennen pye ki genyen pou deplwaman sa plis pase yon lane depi konsèy la te vote anfavèl, diplomat la bay garanti peyi l ap bay sipò finansye pou misyon .
Roberto Alvarez te profite demanti enfòmasyon ki fè kwè Sen Domeng se youn nan founisè zam nan peyi dayiti nan kontrebann, diplomat la fè konnen Repiblik Domikèn pa Fabrike zam epi yo se youn nan peyi ki gen pipiti zak asasinay nan rejyon an.
Antouka se jounen vendredi 26 janvye a lajistis Kenyan ap gen pou deside sou deplwaman fòs sa a, diplomat kenyan ki tap patisipe nan reyinyon konsèy sekirite a di gen espwa pou deplwaman an,yo deja franchi etap preparatif yo, polisye ak pèsonèl kap vin ayiti yo deja swiv fòmasyon espesyal daprè diplomat la ki ankouraje lòt peyi yo kontinye bay lajan ki nesesè pou misyon an.
