Lakou Siprèm nan Eta Kolorado nan peyi Etazini anonse yo bloke kandidati ansyen prezidan ameriken an pou eleksyon primè yo nan Eta sa. Desizyon sa ki pran madi 19 desanm 2023 a, ap bout 4 janvye 2024 ki se dat otorite yo ap fin analize bilten vòt eleksyon primè yo nan Eta Kolorado daprè enfòmasyon jounal ameriken yo rapòte.
Otorite jidisyè nan Eta Kolorado nan peyi Etazini deklare madi 19 desanm 2024 la, ansyen pansyonè mezon blanch lan, Donald Trump pap kapab patisipe nan eleksyon prezidansyèl k ap gen pou fèt nan lane 2024 la.
Lakou Siprèm di li pran desizyon sa poutèt enplikasyon Donald Trump nan atak ki te fèt sou Capitole nan eta Washington nan jou ki te 6 janvye 2021 an. Lakou a mande pou responsab yo rantre tout bilten vòt ki gen non ansyen chèf Leta Ameriken an, Donald Trump, pou eleksyon primè k ap gen pou reyalize 5 mas 2024 la.
Yon lòt kote youn nan pòt pawòl ansyen chèf Leta ameriken an fè konnen desizyon sa “Antidemokratik”. Ansyen prezidan Repibliken an pral pote plent devan Lakou Siprèm peyi Etazini. Li kontinye pou li di, se premye fwa nan istwa peyi Etazini yon jij Lakou Siprèm itilize atik 3 katòzyèm amandman konstitisyon ameriken an pou dekredibilize yon kandida pou pòs prezidan.
Daprè desizyon ki sòti jodi a, si Donald Trump genyen pwosè a devan Lakou Siprèm peyi Etazini avan dat 4 janvye 2024 la, responsab yo ap gen pou mete non ansyen chèf Leta yon lòt fwa sou bilten eleksyon primè 2024 yo jiskaske Lakou Siprèm Kolorado ba li manda pou eleksyon prezidansyèl yo.
