Nan tèt yon delegasyon ki gen ladann Majistra Taba Nice Simon ak plizyè Majistra lòt komin, prezidan federasyon nasyonal Majistra ayisyen yo Jude Édouard Pierre remèt samdi 21 oktòb la yon chèk 4 milyon goud bay komite kap jere kanal la pou kapab kontinye ak travay yo.
Kòb sa se kontribisyon tout Majistra nan peyi a daprè prezidan FENAMH ki te profite egzije konstriksyon yon moniman nan memwa viktim masak 2 oktòb 1937 la.
Youn nan manb komite kanal la sou rivyè Masak ki te resevwa chèk la remèsye Majistra yo pou jès sa,Pastè Moïse joseph raple angajman yo pou byen jere tout èd yo resevwa tankou lajan Ak materyèl pou kanal la.
”Pwojè sa petèt paka bay tout peyi a manje men se yon senbòl ki rebay peyi a espwa, ki prouve n ka relanse sektè agrikòl la,” deklarasyon sekretè jeneral FENAMH a Majistra Rebecarline Deselmond ki felesite peyizan Nòdès yo ki fè fyète tout peyi a.
4 milyon goud sa rive nan moman komite a bewzen lajan ak materyèl pou fini konstriksyon kanal la.
