Nan jou espesyal dimanch 26 me sa a, ki dedye ak selebrasyon fèt manman yo, Konsèy prezidansyèl tranzisyon an pwofite okazyon an pou salye epi voye swè ki sensè ak tout manman an Ayiti.
KPT a di li rekonèt ane sa se yon ane difisil pou nou tout, kit se manman pwofesyonèl, manman madan sara, manman peyizan, manman kiltivatè, manman selibatè, pou n site sa yo sèlman. “Poutan, nan mitan eprèv sa yo, ou kontinye demontre kouraj egzanplè. Lanmou enkondisyonèl ou ak devouman ou se yon enspirasyon pou tout limanite,” se ak mo sa yo KPT a salye kouraj manman ayisyèn yo.
Konsèy la pwofite remèsye manman yo epi rann yo yon omaj ki merite pou sakrifis yo, pasyans ak detèminasyon yo pou pran swen pitit yo, pou kontribiye nan ekonomi nasyonal la manman yo se motè a, daprè konsèy la.
Pou l fini, konsèy la ki gen nan tèt li Edgard Leblanc Fils swete pou jou sa a se pote lajwa, lapè ak rekonesans pou tout manman. KPT a pwomèt pou l kontinye travay pou yon pi bon avni, ki jis, pi pwospè ak mwens inegalite pou tout manman ak fanmi yo.
