Ane 2023 anonse lap difisil anpil pou enstitisyon lapolis la kap konte kadav depi kèk jou. Anviwon kenz (15) polisye mouri nan atak ak zam ak afwontman ak gang nan mwens pase 15 jou. Dènye viktim yo anrejistre se pou mèkredi 25 janvye a, kote 6 polisye mouri nan komin Lyankou depatman Latibonit.
Norabert, Kether, Donaldson, Maden, Félix, Camille se non 6 polisye ki mouri nan dram sa ki pase Lyankou a.“Blese nan eklatman, 6 polisye sa yo te al pran refij yo nan dispansè “Mowo dwè” kote bandi yo antre pran epi al tire yo Savyen”. Se sa Komisè Gouvènman ai nan St-Marc la fè konnen.
Bandi nan gang “Gran Grif” lanse yon seri atak sou komisarya Moreau, yon lokalite nan komin Liancourt, anplis 6 polisye ki mouri yo gen 2 lòt ki blese, sa ki bay yon total 8 viktim nan kan lapolis la. Yo ale tou ak 2 machin enstitisyon polis la pandan atak sa.
Li bon poun raple, nan kòmansman ane a sèlman, anviwon kenz (15) ofisye lapolis tonbe anba bal. 20 janvye pase a, kat polisye te mouri nan echanj kout zam ak manm gang “Kraze Baryè” nan Metivier, komin Petyonvil.
