Nan yon konferans pou Laprès ki te fèt nan lakou New York mèkredi 20 mas 2024 la, majistra vil New York la, Eric Adams, reveran Al Sharpton ak plizyè lòt relijye manifeste solidarite yo ak pèp ayisyen an nan gwo kriz y ap konnen dènye tan sa yo, yo mande Gouvènman ameriken an pou l di yon mo nan sitiyasyon difisil sa peyi a tonbe a.
Se plizyè vwa tou patou nan mond la ki kòmanse leve pou pèp ayisyen an ki anba yon grav kriz Unesco te menm konpare ak yon fim apokalis (fen mond la). Semèn sa, Majistra New York la, mesye Eric Adams ak reveran Al Sharpton plede pou ameriken mennen ankèt sou trafik zam k ap soti nan peyi l Etazini pou rantre pa bò isit nan peyi Dayiti. Li mande Gouvènman Biden nan pou li mete estabilite nan peyi a. Li kwè fòk ameriken aji Kounye a pou pita pa tris.
«Gen dosye nou ka manyen kounye a. Sispann sikilasyon zam nan, sispann depòte ayisyen yo, ba yo ekspètiz yo bezwen pou yo establize kominote yo a pandan n ap ba yo mwayen yo bezwen pou sa nan moman.»
Bò kote pa l, Reveran Al Sharpton rete kwè gen yon neglijans nan ka Ayiti a. Dosye Ayiti pou chèf relijye pa manyen menm jan dosye Ikrèn nan ak dosye nan pwòch Oryan menm si yo gen menm anplè a. «Pandan mond la ap konnen yon kriz nan zòn Oryan, nan peyi Ikrèn, nan emisfè pa n nan tou gen yon sitiyasyon ki pa diferan men k pa abòde menm jan daprè sa n panse. […] Nou mande Mezon Blanch la ak lòt enstans nan gouvènman federal la pou yon panche sou ka Ayiti a. Gen rapò ki fè kwè gen yon trafik zam k ap soti Florid pou antre Ayiti al jwenn gang yo. Kenya pwopoze èd li pou l te voye yon milye solda Ayiti pou ede yo jwenn lapè. Lajan sa, Repibliken bloke l.» Se sa Reveran Al Sharpton deklare nan okazyon konferans sila.
Carl Henry Florant
