Prezidan dominiken an, Luis Abinader nan yon diskou li fè deavn asanble nasyonal peyi dominiken an anonse mi ki pral separe Ayiti ak Repiblik Dominikèn nan pa lwen fini. Mi sa sa konstui daprè chèf Leta peyi vwazen an nan lide pou konbat migrasyon ilegal, trafik dwòg ak zam k ap fèt ant de (2) peyi yo.
Ansyen manm pati revolisyonè dominiken an, Luis Abinader deside separe pati Lès zile Ispanyola ak pati Lwès la. Ansyen direktè jeneral Groupo Abicor la te debloke 1,7 milya peso pou konstui mi fwontalyè sa ki gen yon longè 190 km sou 391 km fwontyè li gen ak Ayiti. Travay sa pou Abinader se youn nan zèv ki pi enpòtan adminstrasyon li a ap gen pou fè pandan manda l la. Gwo miray y ap konstui a pral pèmèt yo kontwole zak malonèt ki te konn fèt sou fwontyè a tankou : trafik dwòg, migrasyon ilegal ak trafik zam ak minisyon, daprè sa prezidan dominiken an fè konnen.
Daprè chèf Leta peyi vwazen an devan Asanble nasyonal la, depi konstriksyon sa kòmanse a, anpil mezi kòmanse pran pou kontwole fwontyè a. Sa ki fè nan pwovens Dajabón, zak vòl yo bese nan nivo 80% konsa. Pou Abinader, konstriksyon mi fwontalyè a pral pèmèt kontwòl sa fèt pi byen epi l ap pote fwi pou komès bilateral la.
N ap raple Ayisyen pa sispann pase mizè nan peyi Abinader ap dirije a. Imigrasyon Kontinye depote ayisyen san yo pa respekte nòm entènasyonal yo.
Carl Henry Florant
