Ministè Sante Piblik ak Popilasyon (MSPP) pibliye yon nòt pou laprès Mèkredi 24 Jiyè 2024 sa a pou avèti popilasyon an sou ka sispèk maladi ki ka gen rapò ak maladi chabon yo dekouvri nan rejyon Fort Royal. Ministè a mande popilasyon an respekte enstriksyon sante yo pou evite pwopagasyon maladi a.
Nan dat 12 jiyè 2024, MSPP te resevwa rapò konsènan ka maladi ki prezante sentòm karakteristik anthrax nan premye seksyon kominal Petit-Goâve, lokalite Fort Royal. Ka sa yo te rapòte apre konsomasyon vyann yon bèt ki te mouri, daprè depatman sante Lwès la.
Ministè a fè konnen gen yon ankèt epidemyolojik k ap mennen pou konnen orijin enfeksyon an, epi aplike mezi prevansyon ak kontwòl ki nesesè yo. Anthrax oubyen maladi chabon se bakteri Bacillus Anthracis ki lakoz li, jeneralman moun kontamine nan kontak ak bèt ki enfekte oswa nan manje vyann bèt ki kontamine. Ou remake maladi chabon an sou po moun ak yon blese nwa, ki pa bay gwo doulè.
MSPP konseye popilasyon an pou yo swiv konsèy sante yo, tankou: Evite kontak ak bèt ki te mouri sanzatann oswa ki malad; Konsilte yon pwofesyonèl sante nan ka gen sentòm ki sanble ak maladi a oswa apre kontak ak bèt ki malad; enfòme otorite sante lokal yo sou nenpòt ka yo sispèk.
Nan sa ki gen pou wè ak ijyèn pèsonèl, MSPP rekòmande pou lave men nou regilyèman ak dlo ak savon, sitou apre w fin manyen bèt oswa pwodwi bèt. Yo ankouraje sila k ap pratike elvaj yo tou pou yo bèt yo vaksen kont anthrax.
