Kòwodinasyon Laprès ak Relasyon piblik Polis nasyonal la prezante bilan operasyon PNH mennen soti 26 mas 2024 pase a pou rive 9 avril 2024 la. Pandan operasyon sa yo Enstitisyon polis la mennen nan plizyè zòn anndan peyi a, PNH la fè konnen li sezi plizyè zam lagè ak anpil minisyon epi genyen plizyè bandi ki tonbe nan afwontman ak Lapolis.
Malgre sitiyasyon difisil peyi a ap konnen dènye jou sa yo, ajan PNH yo pa sispann deplwaye jefò yo pou pote konkou bay popilasyon Ayisyen daprè Pòt Pawòl PNH la Garry Desrosiers. Nan Kad jefò sa yo, Lapolis rive rekipere yon bato bandi Kanaran ki nan baz Jeff yo te sezi ki ta prale nan vil Okap. Enfòmasyon yo te fè kwè bato sa te gen plis pase 60 mil sak diri ladann.
Yon lòt kote, PNH la sezi 12 zam lagè ak 14 pistolè kalib 9 milimèt nan Dwàn Okap la ak sipò ajan dwanye yo. Lapolis ap chache aktivman 2 endividi ki ta enplike nan dosye sila.
Yon lòt kote, PNH la sezi epi konfiske anviwon 1500 katouch, 6 milyon 300 mil goud ak 20 mil dola ameriken, 2 veyikil ak 9 motosiklèt toujou nan dènye operasyon ak entèvansyon l yo.
Genyen 6 ajan PNH ki blese nan afwontman yo ak gang ak zam yo k ap simen latwoublay tou patou nan peyi a, sitou nan zòn metwopmolitèn Pòtoprens la. Genyen tou plizyè bandi ak zam Lapolis rive netralize nan kad entèvansyon yo tankou New York New York ki t ap opere Site Doudoun. Lapolis te pwofite sezi yon zam lagè ak plizyè santèn katouch. Lapolis la nan Jakmèl jou kite 4 avril 2024 la arete Jean Pierre Antony ki t ap opere nan yon gwoup gang nan vil la.
Enstitisyon polisyè a kontinye mande sipò manm popilasyon an pou kwape aksyon gang yo sou teritwa nasyonal la.
Carl Henry Florant
