Nan yon videyo pre-anrejistre ki pibliye sou kont ofisyèl Premye minis la lendi 10 jen sa a, Garry Conille kondane atak bandi ak zam nan Viv Ansanm fè kont yon machin blennde PNH la dimanch 9 jen an ki te lakòz lanmò 3 ajan UTAG.
PM Conille, ki kwè ke sa a se yon atak dirèk sou sekirite ak estabilite nasyon an, pwomèt pou fè tout sa ki posib «pou jwenn otè krim nan».
Apre l fin dekri zak la kòm yon «atak dirèk sou sekirite ak estabilite nasyon an», Garry Conille,te pwofite eksprime kondoleyans li bay fanmi ofisye polis yo. Li pwomèt ke Leta pa pral abandone fanmi «ewo» sa yo epi li pwomèt yo tout sipò li.
«Nou tout dwe mobilize pou asire lajistis viktim yo jwenn jistis epi pou zak sa yo pa rive ankò,» se deklarasyon Premye minis la.
Garry Conille renouvle angajman li pou ranfòse mezi sekirite yo touswit aprè gouvènman l lan fin monte, pou asire pwoteksyon moun ki plase pou sekirize popilasyon ayisyèn nan. Li mande kolaborasyon popilasyon an pou atenn objektif sa yo. «Lapè dwe retounen,» se sa li te di.
