Nan Nouyòk, reyinyon Mèkredi 21 Septanm lan nan asanble jeneral Nasyonzini an te konsantre sou sitiyasyon sekirite a nan peyi Dayiti, ke Kanada fè yon gwo priyorite.
Premye minis Kanadyen an, Justin Trudeau, te reyini plizyè responsab gwoup konsiltatif ad hoc Konsèy Ekonomik ak Sosyal Nasyonzini an sou Ayiti. “Nou gen anpil travay pou nou fè pou ede Ayiti retabli estabilite ak pwosperite, pwoteje sitwayen yo ak retabli konfyans epi pèmèt peyi a pran yon lòt direksyon,” se sa Premye minis kanadyen te di pandanl ap rantre nan reyinyon an, e ki te rapòte pa jounal “Le Devoir”.
Justin Trudeau ki pran an men sitiyasyon Ayiti ap konnen an, mande aktè entènasyonal yo pou chita epi diskite sou fason kominote entènasyonal la ka ede Ayiti, nan sans sa nan reyinyon sila, yon gwoup ki gen ladann peyi Ewòp, Lafrik, Amerik Latin ak Karayib la, ansanm ak Etazini epi Lafrans te rive fòme. Ayiti te reprezante pa Minis Afè Etranjè Jean Victor Généus ak Minis Finans Michel Patrick Boisvert.
Anplis de reyinyon Mèkredi a, Kanada ak Etazini pral òganize ansanm demen vandredi a yon evènman donatè wo nivo vandredi pou ranmase lajan pou Polis Nasyonal ki pa byen ekipe, selon de nasyon sa yo, PNH la se solisyon a ensekirite a epi pwoblèm gang yo.
Pi lwen, mesye Trudeau te anonse yon kontribisyon 20 milyon dola Kanadyen pou ede Ayiti. Èd sila pral itilize pou sipòte travay rekonstriksyon Gran Sid la apre tranblemanntè 2021.
