Depatman Lwès peyi a anba gwo menas yon famin aprè seri atak gang yo ki paralize prèske tout kapital la. Sòti jedi 29 fevriye 2024 la jou atak yo te lanse a, pou rive mèkredi 8 mas la, plizyè bank, plizyè biznis, plizyè mache tonbe anba men chèf gang yo. Mete sou sa, bandi ak zam yo piye epi pran kontwòl pi gwo pò peyi a nan kapital Pòtoprens lan ,APN, pandan kapital la te deja pa gen koneksyon ak anpil vil pwovens.
Kèk jou aprè bandi ak zam yo fin lanse yon plizyè atak kont Gouvènman Ayisyen daprè sa chèf gang yo fè konnen nan videyo k ap fè laviwonn sou rezo sosyal yo, anpil manm nan popilasyon ayisyen an sitou nan depatman Lwès la kòmanse paka jwenn pwodui premye nesesite yo. Nan anpil katye kòmanse manke dlo pou moun bwè pandan kamyon sitèn yo pa kapab alimantè biznis dlo yo.
Yon lòt kote, pri manje yo kòmanse double nan kèk makèt, nan kèk magazen, nan kèk mache, kèk boutik ak nan kèk magazen k ap woule sou rezèv yo te genyen. Anpil nan mèt biznis sa yo menm jan ak machann yo pa ka renouvle estòk machandiz yo nan moman n ap ekri atik sa. Sekirite transpòtè yo pa garanti epi anpil wout bloke.
Mete sou sa, mesye ki regwoupe nan Viv ansanm yo piye plizyè biznis nan depatman Lwès la ak kèk bank kote mèt biznis yo sere lajan. Yon sitiyasyon ki mete propriyetè sa yo nan gwo difikilte pou fè tranzaksyon. Dènye kou ki pou touye koukou a, jedi 7 mas 2024 la, mesye ak zam yo piye Otorite Pòtyè Nasyonal la yo konnen non l sou sig fransè APN, kote anpil manje estoke.
Daprè Jean-Martin Bauer, direktè Pwogwam alimantè Mondyal an Ayiti a (PAM), kantite ayisyen ki nan sitiyasyon ensekirite alimantè a ap eksploze. Li depase kounye a 4 milyon moun. Gen kèk pati nan Pòtoprens ki anba gwo menas famin. Se sa responsab PAM an Ayiti an deklare sou jounal fransè, Le Point. Atik la pibliye vandredi 8 mas 2024 la.
Carl Henry Florant
