Konfli tè a pa kanpe ant abitan Pyat yo ak abitan Delije yo nan komin Monwi. Ayè jedi 21 desanm 2023 a, aktivite yo te paralize nan komin sila poutèt gwo goumen ki te eklate yon lòt fwa ankò ant moun k ap viv nan lokalite Pyat ak Delije, daprè enfòmasyon sal redaksyon an rive jwenn jodi vandredi 22 desanm 2023 a.
Se yon batay pou tè ki la depi kèk tan nan mitan de (2) gwoup moun nou site pi wo nan atik la. Ayè jedi 21 desanm nan, daprè enfòmasyon yo se moun ki soti nan zòn Pyat ki te anvayi peyizan Delije yo. Atak sa ta pral kreye yon sitiyasyon panik nan tout komin la. Sa ki ta pral lakòz anpil aktivite kanpe. Yon lòt kote, barikad tout kalite ki te drese sou wout nasyonal la, te bloke sikilasyon an.
Goumen pou mòso tè sa a deja pote ale lavi plizyè dizèn moun nan zòn nou sot site la yo. Pami moun ki tonbe nan kad batay sila Mèt André Charléus, ki se yo avoka peyizan lokalite Pyat. Li te tonbe anba bal moun yo pa rive idantifye jou ki te 13 avril 2023, pandan l te sou wout pou l antre lakay li nan zòn Akayè. Nap raple majistra komin montrouis a Blaise Elysée nan prizon pou menm Dosye sa a.
Carl Henry Florant
