Rezo Nasyonal Defans Dwa Moun (RNDDH) prezante jodi mèkredi 13 jiyè a yon bilan pwovizwa sou lagè gang ak gang ki te pete nan Site Solèy depi semèn ki sot pase a. Daprè sa òganizasyon dwa moun nan ekri nan yon rapò a: 89 moun mouri, 21 ladan yo boule. 74 lòt moun soti blese, plizyè lòt moun disparèt ak plizyè kay boule.
Depi vandredi 8 jiyè 2022 a, yon batay pete nan Site Solèy ant gwoup ame «G-Pèp» ak «G9 an fanmi e alye» pou kontwòl teritwa. Daprè RNDDH, pou pi piti 89 moun gentan pèdi lavi yo nan lagè sa. Pami kadav sa yo, 21 mouri boule nan dife. Kan «G-Pèp» konte 16 sòlda ki mouri e gwoup G9 la konte «8». Toujou daprè òganizasyon dwa moun nan, anviwon 16 lòt moun disparèt akòz lagè nèg ak zam yo.
Rapò pwovizwa RNDDH la a fè konnen tou prezime bandi «G9 an fanmi e alye» yo boule pou pi piti 127 kay, sitou nan zòn Bwouklin. Plizyè vwa ofisyèl, pami yo Joël Janéus, Ajan Egzekitif Pwovizwa a ak Jean Hislin Frédéric, ansyen Majistra komin nan, leve pou mande moun ki gen zam kap goumen yo pou yo depoze zam yo.
Yon lòt bò, nimewo 1 G9 la Jimmy Cherizier ki depi kèk tan te kenbe yon silans, te parèt nan yon videyo ki t ap sikile sou rezo yo, ki fè konnen batay gang yo nan Site Solèy fè pati yon jefò pou amelyore kondisyon sekirite nan peyi a. «Nou chwazi lanse batay la pou libere peyi a anba men kidnapè yo,» se sa li fè konnen nan videyo a.
Li bon poun souliye depi lè gè sa eklate nan youn nan pi gwo bidonvil peyi a, otorite leta yo, lapolis ak lajistis pa janm fè okenn entèvansyon pou vin mete lapè nan Site a poutan abitan yo kontinye ap rele mande pou vin sove yo anba grif nèg ak zam.
