Nan yon peyi kote kriz sosyo politik la rann sitiyasyon pèp Ayisyen an vin pi difisil, pwopriyetè, direktè lekòl pa sispann monte kantite lajan pou yon paran peye pou lenstriksyon yon elèv. Pandan ke lwa sou frè lekòl yo ki te pibliye an janvye 2017 te trase sèten limit pou yo pa janbe, responsab lekòl yo kontinye mande paran yo gwo kantite kòb. Otorite yo nan piwo nivo leta pa fè okenn jefò pou egzije lekòl sa yo respekte limit lwa sou frè eskolè 2017 la te trase.
Nan kontèks kriz sosyo-ekonomik grav sa a ke popilayon an ap konnen la, ak lwa sou frè lekòl la, egzije lekòl yo respekte limit ki trase a tap yon bon mezi pou paran ayisyen yo ki pa sispann plonje nan lagraba.
Daprè Atik 1 lwa Kelly C. Bastien, tout frè lekòl yo dwe peye nan lajan lokal. Men, reyalite a pwouve lòt bagay. Gen kèk lekòl ki fè paran yo peye yon frè menm pou achte inifòm ak materyèl eskolè yo nan lajan Tonton Sam nan. Gen lòt ki enpoze pèman an yon pati nan frè anyèl la nan lajan Ameriken.
Paran Ayisyen yo lage pou kont yo nan yon batay san fen kont responsab lekòl yo, ki pa sispann peze kou malere ak malerèz kap goumen pou bay timoun yo pen lenstriksyon. Nan pifò peyi nan mond lan, otorite yo pran dosye edikasyon an a kè paske pou peyi sila yo edikasyon se motè devlopman. Pandan tan sa an Ayiti se responsable lekòl yo ki dirije edikasyon an nan liy kap bon pou yo ekonomikman, leta pa janm pran okenn desizyon ki pou soulaje paran Ayisyen yo. Sitiyasyon sa lakòz edike yon timoun an Ayiti se yon fado tout paran ayisyen ap pote sou do yo.
