Aprè demann gouvènman ayisyen an, Lèzetazini te deziyen peyi Kanada pou pran lidèchip yon posib misyon fòs etranje an Ayiti,chak jou ki pase Kanada montre a klè li pa deside oubyen li pa pare pou pran responsabilite sa.
Nan yon entèvyou Mèkredi 18 janvye a sou sitiyasyon kriz k ap domine an Ayiti an, Anbasadè Kanada nan Nasyon Zini, Bob Rae, te montre li gen dout sou posiblite pou yon fòs etranje entèvni an Ayiti e bay solisyon dirab.
Daprè Rae, sikonstans ki te mennen chèf gouvènman ayisyen an pwodui demann sa a chanje. Li fè remake ke tèminal petwolye a libere, medikaman kon maladi kolera rive Pòtoprens e Kanada rive delivre sis machin blende Leta ayisyen te achte pou ranfòse kapasite operasyon polis nasyonal la.
“Diskisyon yo ap kontinye ant Ottawa ak Washington pou idantifye pi bon fason pou entèvni an Ayiti”, se sa Anbasadè Rae te ajoute. Li raple ke entèvansyon militè Nasyonzini anvan yo an Ayiti pa t kapab pote okenn solisyon dirab.
Selon Bob Rae, Kanada vle ensiste pou “Ayiti deside”, ki pran an konsiderasyon sekirite, politik ak devlopman. Sepandan, Kanada pa deside si l ap voye ou pa yon fòs polis an Ayiti.
The Globe And Mail/Tele pam
Jean Kenson CARRIES (JKC)
