Milye teren ayisyen an, Melchie Daëlle Dumornay, se sèzyèm (16yèm) pi bon jwè fanm aktyèl nan mond foutbòl la. Se magazin Gola.com ki fè anons sila nan yon atik ki pibliye madi 19 desanm 2023 a, sou sit entènèt yo a. Klasman sila chita sou pèfomans jwè fanm yo pandan sezon 2022-2023 a.
Meye jwè fanm ayisyen an, Corventina, pa sispann briye tou patou kote li pase. Pèfomans sipèsta ayisyen an nan seleksyon nasyonal la ak nan klèb ba l yon plas nan top 50 pi bon jwè fanm daprè Goal.com. Grenadye a okipe sèzyèm plas nan nouvo klasman sa.
Magazin sa ki chita nan plis pase 50 peyi bat bravo pou pèfomans pi bon jèn jwè fanm mond lan pou moman an. Goal detaye chif jwè fanm ayisyen an nan ansyen klèb li Stade de Reims. Sou koulè ekip Renwa sezon pase a, Melchie enskri onz (11) gòl, li bay senk (5) pas desizif pandan klèb li fini nan mitan tablo a.
Yon lòt kote, magazin nan souliye bèl jefò Corventina ak ekip nasyonal la. Nimewo 6 ayisyen te mete Ayiti sou do l pou l ofri l premye kalifikasyon l pou Koup di mond nan nivo senyò. Li make de (2) gòl kont ekip Chili a ki ta pral bay Ayiti biyè pou l al jwe mondyal la. Nan konpetisyon sa a, malgre jwè ayisyen yo pa t nan pi bon fòm yo, Corventina te montre tout talan li. Se sa magazin Goal.com fè konnen.
Nan klasman sa, foutbolè fanm ayisyen an fini sèzyèm nan do jwè fanm Espanyòl Alba Redondo (15èm) devan jwè fanm Ameriken, Crystal Dunn (16èm). Nan tèt klasman nou jwenn: Racheal Kundananji (1èm), Asisat Oshoala (2èm) ak Linda Caicedo (3èm).
N ap raple Melchie Daëlle Dumornay se sèl jwè fanm ayisyen ki nan lis 50 pi bon jwè fanm nan mond lan.
