Ansyen vedèt seleksyon Brezil Mario Jorge Lobo Zagallo, mouri vandredi 5 janvye 2023 pase a. Se sa fanmi ansyen jwè brezilyen an kominike sou Instagram, jodi samdi 6 janvye 2023 a. Ansyen antrenè Brezil nan lane 1970 pati kite nou nan laj 92 an, akoz pwoblèm sante.
Yon lòt lejand kite nou aprè Pele, Wa foutbòl la ak Maradona pou anpil moun ki se dye foutbòl la. Mario Zagallo, ansyen milye teren ekip Brezil la kite mond sa aprè konplikasyon sante daprè sa fanmi an fè konnen.
Ansyen koyekipye Pele a te kouche lopital pandan 2 semèn aprè lanmò Wa foutbòl la. Mario Zagallo ranpòte Koup dimond 1958 ak 1962 pandan l t ap jwe foutbòl epi li ranpòte Koupdimond 1970 la pandan li t ap antrene seksyon foutbòl maskilen Brezil la. Li te seleksyonè adjwen nan lane 1994.
“Se avèk anpil tristès m ap anonse nou nouvèl lejand ki pran 4 Koup dimond la, Mario Jorge Lobo Zagallo”, se sa fanmi an ekri sou Instagram avan yo kontinye pou yo di ansyen jwè brezilyen an se te yon papa ki gen sans responsabilite.
Li te tou yon gran papa ki gen bon kè. Fanmi ansyen vedèt seleksyon Brezil la te wè l tankou yon bòpè ki gen lanmou, yon zanmi fidèl, yon pwofesyonèl akonpli epi yon bon moun, yon gwo bout tonton zidòl. Se yon patriyòt ki kite nou ak anpil gwo reyalizasyon.
Nan lide sa, konfederasyon foutbòl brezilyen an (CBF) deklare sèt (7) jou dèy pou salye depa lejand foutbòl brezilyen an. Se prezidan Federasyon an, Ednaldo Rodriguez, ki fè anons sa.
N ap raple, ansyen milye teren brezilyen an te kouche lopital poutèt enfeksyon respiratwa aprè lanmò Wa Pele. Nan mwa dawout lane pase a, li te tounen kouche sou kabann lopital poutèt enfeksyon irinè.
Carl Henry Florant
