Daprè Òganizasyon Entènasyonal pou Migrasyon yo (OIM), nan sèlman 10 jou, 9 901 sitwayen ayisyen kouri kite lakay yo poutèt zak vyolans nèg ak zam yo ki nan dènye semèn yo vin pi plis ankò depi 5 fevriye 2024 pase a. Moun sa yo se sitou moun nan komin Kwadèboukè, komin Site Solèy ak komin Kafou.
Ensekirite a kontinye ap fè ravaj sou teritwa nasyonal la sitou nan zòn metwopmolitèn Pòtoprens la. Bandi ak zam kontinye ap maspinen popilasyon sivil la anba je otorite Leta yo ki pa fè anyen pou pote siywayen yo sekou ,yo pito kwaze pye yo ap tann sekou kenya.
Pandan tan sa, gang nan Kwadèboukè,Site Solèy ak kafou ap taye banda. Lagè ant gang rival yo pwovoke deplasman plis pase 9 000 sitwayen ayisyen nan mwens pase 10 jou si n dwe kwè enstans Nasyonzini an nan yon rapò li pibliye nan semèn nan. Òganizasyon Entènasyonal la presize chif sa yo kapab ogmante paske y ap ajoute tanzantan.
Nan anpil videyo ki t ap fè virewon sou rezo sosyal yo nou te kapab wè moun nan komin Site Solèy, Rivyè Fwad, Tè blanch, Tè Nwa, Blancha, Divivye ak pakèt nan men ak ti moun sou bra yo k ap chache kote pou yo ale, pou yo pa viktim nan zak vyolans yo. Se te menm konsta tou pou moun Kafou ki pa t sispann lanse SOS pou otorite Lapolis yo.
Daprè OIM, anpil nan fanmi sa yo al pran refij nan kèk lekol, legliz oubyen sou plas piblik. Genyen tou ki ale lakay kèk pwòch fanmi. 90% nan endividi sa yo refijye nan zòn metwopmolitèn la oubyen depatman Lwès la, 10% ale nan vil pwovens tankou Nip, Sant ak lòt vil ankò.
Jouk kilè popilasyon an ap rale yon souf ? Se kesyon sa sitwayen sa yo ki Kouri kite lakay yo pa sispann poze tèt yo. Eske Leta ayisyen ap pote repons bay moun sa yo ? Eske Leta ap toujou kwaze pyel tann mouche blan pito ?
Carl Henry Florant
