Yon gwo dife eklate andan pi gwo prizon Sivil peyi a, Penitansye nasyonal, jodi jedi 14 mas 2024 la, anviwon 2 semèn prèske tout prizonye yo te sove kite prizon sila. Pou moman, enfòmasyon yo pa ko revele sous dife sa.
Se te samdi 2 mas la bandi ak zam te atake Penitansye nasyonal ki ta pral pwovoke yon evazyon masif nan prizon an. Enfòmasyon yo te fè kwè pi fò prizonye yo te sove kite prizon an jou sa. Kèk grenn ki te rete yo, otirite polisyè yo ta pral transfere yo nan lòt espas. Jodi jedi a, pi gwo sant kaseral peyi a sibi yon lòt atak ankò.
Byen bonè nan maten, yon dife eklate nan prizon an. Byen lwen ou te kapab wè gwo lafimen ak flanm dife k ap soti nan espas la. Daprè Radio RFM ki rapòte yon sous li,
dife sa ta eklate nan espas yo rele Titanic la anndan Penitansye nasyonal. Pou kounye a, enfòmasyon yo pa endike kisa ki ta lakòz dife sila.
N ap raple, pa genyen detni anndan sant kaseral sa ankò ni dosye enpòtan. Depi aprè atak ki te sakaje l jou pase yo, otorite yo te deplase tout rès prizonye yo ak dosye enpòtan yo.
Carl Henry Florant
