15 mas pase a Fatima Altieri mete deyò yon nouvou pwojè ki pote non «Souvni». Mizik sa se youn nan tèks k ap sou album chantez la ap gen pou l rann piblik pandan ane 2024 la. Avèk Souvni atis ayisyèn nan ap chèche pote lespwa nan kè sila yo k ap soufri jis anndan kè yo akoz sitiyasyon difisil la an Ayiti.
Mizik sa ki ak tout videyo dire 3 minit 37 segonn, se yon tèks ak bèl pawòl ki chita sou yon melodi ki dous men ki tris. Nan tèks la ki chaje ak emosyon atis la pa kache lapenn ak chagren ki anvayi kè l chak jou, «Gen jou m p ap viv M jis ap respire Gen jou m tante plonje se vid la k atire m Ale lwen, retire ´m.»
Pi lwen Fatima Altieri fè konnen li soti pwojè sa nan yon kontèks kote peyi Dayiti ap konnen yon kriz san parèy, sa ki lakoz estrès kalamite ak lapenn ap pote anpil moun ale. Nan tèks la mannken an pote yon mesaj lespwa li raple n, «demen se yon nouvo jou Yè jis yon souvni.»
Yon lòt bò fanatik ak sipòtè atis la pat pran tan pou reyaji nan espas kòmantè yo anba pwojè sa. Gen anpil moun ki kwè Fatima retrase egzakteman reyalite yo ap viv chak jou ak estrès epi depresyon, yo apresye kalite mesaj entèprèt mizik «Dodo» a fè pase a. Men tou gen anpil lòt ki pa t met dlo nan bouch yo pou fè konnen yo pa apresye yon pati nan videyo a kote atis la metel tou touni. Pou eksplike l chantez la fè konnen lè wap eksplike yon moun yon bagay ki lou, ki peze sou kèw epi ki rann ou vilnerab se tankouw t ap dezabiyew devan moun sa.
Se vre gen jou nou santi nou p ap viv nou jis ap respire, gen jou tou nou tante plonje se vid la k atire n, raple n sèlman yè se yon souvni, demen se yon nouvo jou, solèy la ap leve kanmenm.
Jean Kenson Carries (JKC)
