Nan kòmansman semèn sa nèg ak zam anvayi plizyè zòn nan komin Petyonvil, atak yo ki fèt lajounen kou lanwit deja lakoz plis pase yon ventèn moun pèdi lavi yo.
Avan sa, lendi 18 mas pase a abitan yo te leve jwenn aviwon 15 kadav nan zòn won pwen Petyonvil pou ale ri Panamerikèn, ak lòt ri nan komin nan, jiskaprezan pèsonn konnen byen nan ki sikonstans moun sa yo rive pèdi lavi yo.
Yo lòt bò nan menm jounen lendi 18 mas nèg ak gwo zam te anvayi Laboul ak zòn ki antourel yo, yo antre nan plizyè kay pote ale tout sa yo jwenn, pami kay sa yo rezidans prive Jean Volmar Demesyeux ki se jij nan lakou kasasyon an pat epanye.
Mèkredi 20 mas sa anpil kout bal chante nan zòn Meyòt, Dyèg, Girado, Bristou ak lòt ankò.Popilasyon an ki pa konn ki sen pou yo rele lanse SOS pou lapolis pote yo sekou.
Nap raple nan menm jounen mèkredi sa gen pou pi piti 3 kadav lonje nan plizyè kwen nan Komin sa. Aktivite yo paralize, se kèk grenn ti machanm ki oblije pran lari a pou vin chèche lavi, yon lòt bò tout gwo magazen ak bank yo fèmen pòt yo.
Redaksyon an
