Plizyè sòlda fòs defans peyi Bahamas ak sòlda peyi Beliz debake Jamayik nan week-end sa, pou patisipe nan seri fòmasyon sòlda lame peyi Kanada ap founi militè ak polisye k ap gen pou debake an Ayiti nan yon ti bout tan.
Gouvènman peyi Kanada ki pa t vle pran tèt Misyon miltinasyonal ki gen pou deplwaye Ayiti a vle pote soutyen l yon lòt fason bay fòs sa ki ta dwe antre nan peyi a vin kore Lapolis nasyonal la nan kad batay l ap mennen kont gang ak zam yo. Nan yon kominike ofisyèl, Minis defans peyi Kanada te pibliye vandredi pase a, li anonse 70 nan manm fòs lame l la pral fòme anviwon 300 sòlda misyon Nasyonzini k ap gen pou vin sou ti bout tè pati Lwès Zile Ayiti a nan peyi Jamayik.
Fòmasyon sa, se gouvènman peyi Jamayik la, ki te mande sòlda kanadyen yo pou vin pataje kèk konesans nan eksperyans yo ak militè sa yo ki prale nan Misyon an. Se konsa militè plizyè peyi ki ap nan fòs miltinasyonal la gentan pran direksyon peyi Jamayik pou al resevwa fòmasyon sila. Vandredi pase plizyè sòlda Beliz te foule sòl Kingston lan pou ale suiv fòmasyon sa a. Dimanch 31 mas la, 60 sòlda Bahamas debake Jamayik pou al mete plis bèt sou yo nan kad fòmasyon sa k ap dire yon mwa, avan yo pran direksyon peyi Dayiti.
N ap raple se te 2 oktòb 2023, Konsèy sekirite Nasyonzini an te bay otirizasyon pou fòs etranjè a foule sòl Papa Dessalines la. Fòs sa ki ap genyen ladann polisye ak militè a ap gen nan tèt li peyi Kenya.
Carl Henry Florant
