Sipèsta ayisyen an Melchie Daëlle Dumornay ofri yon bèl viktwa (3-2) bay klèb li Olympique Lyonnais ki t ap twoke kòn ak ekip feninen Paris Saint-Germain an nan okazyon demi final ale Lig Chanpyon feminen an. Grenadye a enskri yon gwo gòl epi l bay yon pas gòl samdi 20 avril 2024 la.
Se premye jwè ayisyen ni nan kategori gason ni nan kategori fanm ki rive nan nivo sa nan Lig Chanpyon ewopeyen. Pou premye match Melchie titilè, li livre yon prestansyon san parèy. Patisipasyon l nan jwèt la, fason l ap kreye espas pou koyekipye l yo li te distenge l sou teren an. Yon lòt kote, jwè fanm ayisyen an ede ekip la anpil nan rekiperasyon.
Si PSG te jere pi byen epi bat premye mitan an match la (2-0), kolèg Melchie yo pa t dekouraje. Nan 2è mitan, ekip la redouble efò devan piblik yo pou redui eskò a nan 80yèm minit (1-2). Se K. Diani ki te make gòl la. Nimewo 6 ekip lyonè a, Dumornay, fè yon gòl sou yon frap kote balon an al tonbe nan likàn nan pou pèmèt ekip li egalize (2-2), nan 85yèm minit nan match la. Yon minit aprè oubyen nan 86è, Melchie bay yon pas gòl pou A. Majri ki pral mennen viktwa pou ekip Lyonè a.
Pèfomans sa yo pèmèt Corventina fini meyè jwè fanm demi final ale Lig Chanpyon sa. Viktwa sa ansyen jwè fanm AS Tigresse bat ekip li a pèmèt tou ekip Olympique Lyonnais a gen yon pye l nan final.
Carl Henry Florant
