Elèv toupatou anndan peyi a ap konnen yon ane lekòl difisil akoz sitiyasyon sosyopolitik la ki malouk anpil. Nan kontèks difisil sa, Ministè Edikasyon Nasyonal ak Fòmasyon Pwofesyonèl (MENFP) devwale yon inisyativ ki vize sipòte elèv ki pi afekte nan kriz peyi Dayiti ap konnen la.
MENFP a anonse relansman sistèm konpansasyon edikasyonèl li a, ki vize konsantre efò li prensipalman sou elèv nan zòn metwopolitèn Pòtoprens lan ak Latibonit ki pa t ka prezan nan klas pandan anpil jou akoz kriz peyi a.
Anplis kou nan sal klas yo MENFP ap itilize teknoloji edikatif pou ede timoun ki touche yo. Pwogram sa ap gen ladan plizyè resous edikatif, tankou videyo, emisyon radyo ak televizyon, ansanm ak platfòm nimerik. Zouti konplemantè sa yo pral ede elèv ki nan difikilte yo ratrape yo andeyò anviwònman sal klas tradisyonèl la.
Ministè a ankouraje pwofesè ki enterese nan pwogram sa a pou yo enskri nan direksyon lekòl yo pou yo benefisye resous adisyonèl yo epi pou yo patisipe nan egzamen leta yo k ap fèt an liy sèlman ane sa.
