Polisyè Barbara Fequi ki soti nan 32yèm pwomosyon an mouri anba bal bandi ak zam mèkredi 8 me sa a nan ri Camille Léon pandan yon tantativ kidnapin, se Sendika Nasyonal Polisye Ayisyen yo (SYNAPOHA) ki konfime nouvèl la.
Enstitisyon lapolis la, depi plizyè ane, rete sib endividi ak gwo zam k ap fè ravaj nan peyi a chak jou ki jou. Mèkredi 8 me 2024 sa, se tou pa Barbara Fequi, ki te afekte nan Direksyon Jeneral Lapolis la, bandi san fwa ni lwa asasinen, krim lonje lis polisye ki tonbe pou 2024 la. Nan 5 mwa sa yo sa fè 17 polisye ki mouri ak bal.
