Lapolis nan Gonayiv mete anba kòd mèkredi 8 me 2024 la Jerry Carra ak Destin Jackson, paske yo enplike nan kidnapin yon jèn demwazèl ki gen 19 lane.
Daprè yon nòt kowòdinasyon laprès ak relasyon piblik PNH la mete deyò, 2 jenn gason sa yo avwe pandan odyans yo, yo patisipe nan kidnapin sa a, yo te mande fanmi demwazèl la 200 mil dola ameriken pou yo te ka libere l. Nan lajan sa, fanmi an te deja ba yo yon kantite 50 mil dola ameriken, ansanm ak yon lòt pati an goud.
Yon lòt bò, fòs lòd yo fè konnen kidnapè yo konfese tou yo te vyole viktim nan. Pou kounya, Jerry Carra ak Destin Jackson nan gadavi pandan y ap tann aksyon legal ki nesesè yo.
Depi plizyè lane kidnapin tounen yon gwo antrepriz pou nèg ak zam san fwa ni lwa, si prensipal rezon yo poze zak malonèt sa se pou rantre lajan men tou yo konn pwofite vyole medam yo, sa ki konn twomatize viktim pou rès lavi l.
