Dosye fatra tout ti kwen nan Pòtoprens lan ak zòn metwopolitèn nan te fè deba lendi 20 me a nan kad yon jounen travay konsèy prezidansyèl la te òganize nan “Villa d’acceuil” la. KPT a anonse yon gwo operasyon pou netwaye Pòtoprens la ak tout zòn ki anviwonnen l yo.
Achitèk Leslie VOLTAIRE, nan non KPT a, te pale ak yon delegasyon majistra nan zòn metwopolitèn nan ansanm ak DG Sèvis Nasyonal Jesyon Residi Solid (SNGRS). Yo te gade divès obstak yo rankontre nan pwosesis netwayaj kapital la ak anviwonman li yo.
Ajan PNH la ak ajan FAD’H yo pral mobilize pou garanti sekirite operatè MTPTC, SNGRS ak meri yo ki pral travay di nan objektif pou chanje visaj Pòtoprens la.
Pwojè sa a vize pou pi piti senk (5) rezilta pozitif nan benefis popilasyon an: 1- pwoteje sante moun ki abite nan kapital la kont pwopagasyon mikwòb ak fatra ki pote tout kalite maladi. 2. diminye risk ak anpeche gwo katastwòf ki ka rive nan mwens pase yon mwa lè pwochen sezon siklòn lan ap rantre. 3. favorize netwayaj epi fè lari kapital la vin bèl. 4. kreye de mil senksan (2,500) travay dirèk ak anviwon dimil (10,000) djòb endirèk. 5. kreye yon klima politik ki favorab pou nouvo gouvènman an pran an chaj administrasyon piblik la, chwa premye minis la ap fèt aktyèlman.
