Nan yon kominike pou laprès Ministè edikasyon nasyonal ak fòmasyon pwofesyonèl anonse li sispann pèmi pou dirije, Clément Geffrard Lanier, ki se direktè administratif ‘’Enstitisyon Georges Sylvain ‘’ ki nan Fresino, nan vil Sen-Mak, aprè vyolans grav li fè sou yon elèv nan lekòl sa a. MENFP sispann tou Pèmi pou Dirije Félix Estimé ki se direktè prensipal lekòl la.
Daprè kominike a ministè a fè konnen li pran desizyon sila apre rapò li jwenn ki sòti nan Direksyon Depatmantal Edikasyon Latibonit la ki konfime zak vyolans grav ki fèt sou yon elèv anndan lekòl la. Elèv sa nan klas Segondè 2, zak la te pase nan jounen lendi 20 Me 2024 la.
“Konpòtman direktè sa a, pa respekte okenn prensip nan zafè lekòl, ni sa ki di sou règleman legal sou entèdiksyon chatiman kòporèl anndan lekòl yo”, daprè sa nou li nan kominike MENFP a.
Ministè di pi devan li pran lòt dispozisyon pou bay timoun sa a ankadreman sikolojk ki nesesè pou evite tout dega nan pakou akademik li.
Ministè a mande sitou paran yo, pou yo rete vijilan yon fason pou kwape zak vyolans anndan lekòl yo. Li mete 2 nimewo disponib yo ka rele si yo ta remake yon zak malonèt konsa : 31 26 75 19/47 20 43 75.
N ap raple yon zak konsa te pwodui nan Nòdès peyi a, kote ministè a te sispann pèmi Annebert Joseph, direktè lekòl nasyonal Béthel Bethesda, apre zak vyolans li sou yon elèv paske l te pran lwa.
