Yon rankont te òganize jedi 23 me 2024 sa la ant manm Konsèy prezidansyèl tranzisyon an (CPT) ak yon delegasyon peyi Kenya ki an Ayiti depi 20 me. Reyinyon sa a te vize prepare pou deplwaman Misyon Sipò Sekirite Miltinasyonal (MMSS) la nan peyi a.
“Konsèy prezidansyèl tranzisyon an te rankontre ak yon delegasyon Kenya aprè midi a pou diskite sou preparasyon ak aplikasyon deplwaman Misyon Sekirite Miltinasyonal la “, Sa se Edgard Leblanc Fils, prezidan aktyèl CPT la, ekri sou kont X li.
Toujou nan kad preparasyon pou deplwaman fòs miltinasyonal la, enspektè jeneral an chèf polis la, Fritz Saint Fort, rankontre kòmandan inite espesyalize yo menm jou a. Li ankouraje kòmandan yo pou yo konpòte yo yon fason pwofesyonèl pandan operasyon yo ansanm ak fòs etranje yo, epi li felisite yo tou pou kouraj yo fas ak ensekirite a k ap vale teren.
