Mezon blanch ap soutni “deplwaman rapid” misyon entènasyonal la ki vize garanti sekirite an Ayiti, apre twa moun, ki gen ladan yon koup misyonè Ameriken, mouri asasinen nan lannwit 23 me 2024 la.
“Sitiyasyon sekirite an Ayiti pa ka tann pou jwenn yon solisyon,” deklarasyon yon pòtpawòl Konsèy Sekirite Nasyonal Mezon Blanch Vandredi 24 me, li te tou pwofite voye senpati l bay fanmi viktim yo.
Yon lòt bò, Donald Trump, ansyen prezidan Etazini, te reyaji apre asasina de (2) misyonè ameriken yo. Li priye pou moun ki mouri yo pandan l tou pwofite mande lajistis pou l jwenn epi pini koupab krim sa. Li pwofite raple tou ke Ayiti se yon teritwa san kontwòl. Li te fè reyaksyon sa vandredi 24 me 2024 sa a sou rezo “Truth Social”.
Pou rapèl misyonè Ameriken Nathalie Lloyd ak David Lloyd mouri nan yon atak nèg ak zam nan lannuit jedi 23 me pou rive vandredi 24 me 2024 nan Lizon 39, anndan òfelina “Bon espwa”. Responsab òfelina, Jude, mouri tou nan atak sa.
