Gwo afwontman ak zam nan komin Gresye ant ajan polis Nasyonal Dayiti a ak bandi ki tabli katye jeneral yo depi plizyè semèn nan komin sa. Nan atak sa, bandi yo mete dife nan yon blende PNH la.
Nan videyo ki viral sou rezo sosyo yo, bandi ak zam ki fè alyans ak Gran Ravin revandike zak sa kote yo mete dife nan blennde lapolis itilize nan batay kont bandi yo. Zak sa rive alòske lapolis te anonse li repouse bandi yo ,yo repran kontwòl komisarya vil sa a.
Bandi ak zam nan rejyon metwopolitèn nan kontinye ap montre pwisans yo, wout Gresye ki mennen nan sid peyi a toujou rete yon wout frajil pou popilasyon an. Pandan tan sa chak semèn, enfòmasyon yo evolye nan sa ki gen pou wè ak rive fòs miltinasyonal la nan peyi a. Si semèn pase a enfòmasyon yo te fè wè se fen me a fòs la t ap rantre, semèn sa done yo chanje, posibilite a se nan 3 semèn, kidonk nan mitan mwa jen selon prezidan kenyan an William Ruto.
Bandi yo kontinye ap pwouve koze fòs sa pa enkyete yo, yo pito ap kreye estrateji pou kontrekare MMSS la, nan sans sa yo deja kraze plizye pòs polis tankou sou komisarya Matisan Gran Ravin ak komisarya Kwadèboukè. Sanble Direktè jeneral polis la menm jan ak popilasyon an kwaze bwal ap tann fòs la pandan peyi a ap kraze.
