Nan yon lèt li adrese ak sekretè Jeneral Nasyonzini an Antonio Gutierres, ansyen dépite 50yèm lejislati Tirivyè Latibonit la Prophane Victor konteste rapò rezolisyon 2643 (2022) a.
”Sa etonem lè mwen li rapò final manm gwoup ekspè yo nan rezolisyon 2643 (2022) Konsèy Sekirite Nasyonzini an konsènan Ayiti, kote mwen gen sou dom akizasyon grav ki gen rapò ak swadizan patisipasyon mwen nan bay zam ak sipòte gang nan depatman Latibonit,” se sa nou te ka li nan yon nòt Victor Prophane rann piblik paralèlman.
“Mwen konteste epi pote yon demanti sou fo akizasyon sa yo, sa ki lakòz gwo domaj non sèlman nan repitasyon mwen, men tou kreye gwo konfizyon nan mitan plizyè milye elektè m yo nan ”Petite-Rivière” ki te vote pou mwen pandan eleksyon 2016 yo,” se sa ansyen palmantè a te kontinye pou l di.
selon ansyen depite a ekspè yo pa gen prèv de sa yo site non’l nan rapò a, se sou baz rimè ak deklarasyon bandi eskpè Nasyonzini yo chita pou yo akize’l. “Akizasyon ki genyen nan rapò sa a chita sèlman sou deklarasyon gang yo medya sosyal yo rapòte oswa deklarasyon advèsè mwen yo, ki pare pou fè tout sa ki posib pou elimine m sou sèn politik la,” toujou daprè Prophane.
Ansyen palmantè sikonskripsyon Tirivyè Latibonit la deklare sou Radio Pyramide FM nan Gonaïves li te deja disponib pou lajistis lap kontinye disponib pou lajistis Ayiti tankou lòt peyi ki enterese ak vrè vèsyon sou dosye akizasyon kap peze sou do l la.
Nap raple ekspè yo nan Nasyonzini kap travay sou dosye Ayiti a, te rann piblik yon rapò ki gen anpil pèsonalite Ayisyen tankou ansyen Prezidan Michel Joseph Martelly, Youri Latortue, Romel Bell, Prophane Victor, Reynold Deeb, moun sa yo gen akizasyon sou do yo kòm moun kap bay zam, sipòte gang epi plonje nan koripsyon an Ayiti. 13 novanm kap vini la Nasyonzini anvizaje pibliye yon lis ki pi long ak non tout pèsonalite ki nan zak malonèt sa yo nan peyi a.
