Chèf gouvènman ayisyen an, Doktè Ariel Henry prezante lane 2024 sa kòm yon lane gwo konba. PM nan ki lanse yon apèl tèt ansanm pwomèt gouvènman l lan ap batay pou l retabli lapè sou teritwa nasyonal la ak kreye travay pou met lajan nan pòch sitwayen ayisyen epi reyalize eleksyon anndan peyi.
Swè Premye Minis ayisyen Doktè Ariel Henry anpil pou lane 2024 sa ki pwente tèt li jodi lendi 1e janvye a. Nan yon diskou tou kout Primati pibliye sou rezo yo, chèf gouvènman deklare lane sa se lane gwo defi pou pèp ayisyen an. Men se nan tèt ansanm y ap rive genyen batay la. “Fòk nou rebay fyète ak frè nou yo ak sè nou yo. Fòk nou tou retabli ekonomi peyi a“, se sa Ariel Henry deklare avan li ajoute “Fòk nou reyalize eleksyon lib epi demokratik anndan peyi a yon fason pou n pèmèt moun pèp la chwazi vin pran tèt peyi a”.
Premye Minis ayisyen an kwè Ayiti kapab tounen jan l te ye lontan, kote valè moun te respekte. PM nan lanse yon apèl ak Ayisyen k ap viv isi kou lòt bò dlo, “pou n fè yon konbit nasyonal pou pèmèt peyi a leve eskanp figi l, pou l vanse pou pi devan, pou l bay demokrasi a jarèt”. Chèf Primati a te pwofite swete peyi ki di yo se zanmi Ayiti tou yon lane chaje ak siksè li swete sipò yo pou Ayiti pral pi sere toujou.
N ap raple, akò ki te pèmèt Ariel Henry rete sou pouvwa jouk jounen jodi a ap bout 7 fevriye lane sa a menm. Aktè politik opozisyon yo gentan ap touse manch chemiz yo pou yo reklame depa Premye Minis ayisyen la, yo di ki pa kenbe pwomès li.
Carl Henry Florant
