Jedi 14 desanm nan, Premye Minis la, Ariel Henry, te akeyi manm kò diplomatik la, sektè prive ak medya yo nan primati a nan Musseau, nan okazyon seremoni salitasyon ofisyèl yo ki make fèt fen ane a.
Pandan aktivite sa a, chèf gouvènman an eksprime rekonesans li bay kominote entènasyonal la pou sipò li pandan peryòd kriz sa a. Li fè lwanj pou pèseverans misyon diplomatik yo ki te kenbe malgre sitiyasyon sekirite difisil.
Ariel Henry te mete aksan sou rive Misyon Sipò pou Sekirite Miltinasyonal (MMSS), ki gen pou vin retabli yon anviwònman ki estab an Ayiti.
Li te pale de efò emisè CARICOM yo te fè pou rezoud kriz politik la, sepandan li eksprime regrè l akoz kèk aktè pat montre volonte pou rive nan yon konsansis.
Premye Minis la pwomèt pou l kontinye chita pale ak opozisyon an elaji gouvènman an, jwenn solisyon pou kriz la, prepare wout pou eleksyon demokratik.
Nan mesaj li pou sektè prive a, Ariel Henry rekonèt difikilte ekonomik ane ki sot pase yo pandan l te fè lwanj kontribisyon li nan revni ladwàn yo. Li anonse yon ranfòsman patenarya piblik-prive pou konstwi yon avni ki pi pwomèt pou tout sitwayen yo.
Chèf gouvènman an fè lwanj wòl enpòtan medya yo nan ranfòsman demokrasi, li mande transparans nan misyon yo.
Nap presize seremoni sa te dewoule sou chantye “villa d’accueil” la ,Biwo premye minis yo ki te kraze nan tranblemandtè 12 janvye 2010 dwe inogire janvye 2024 selon Ariel henry ki promèt ane 2024 la ap yon ane rekonstriksyon.
