7 jiyè 2022 k ap vini la ap fè yon lane depi prezidan Jovenel Moïse te mouri asasinen anndan lakay li nan Pèleren 5. Gouvènman Ariel Henry ap menmen an deside òganize yon seremoni nan memwa ansyen prezidan an nan Jaden MUPANAH nan okazyon premye anivèsè lanmò Jovenel Moïse. Pou jounen sa, gouvènman Ayisyen an te voye envitasyon bay fanmi prezidan pou vin patisipe nan seremoni sila. Martine Moïse sou bò pa l anndan yon nòt ki parèt sou rezo yo fè konnen fanmi mari l pa gen okenn entansyon patisipe nan okenn aktivite Leta Ayisyen ap fè pou make memwa prezidan asasinen an.
Nan nòt la ansyèn premyè dam nan fè konnen yo deside boude envitasyon sa se paske Leta sa ki gen nan tèt li yon chèf gouvènman li di ki gen dout sou li nan koze asasina prezidan an. Nan nòt la Martine Moïse « envite chak grenn moun ki afekte pa lanmò sa pou mete men nan batay la yon fason pou fè lajistis blayi kont tout moun ki patisipe nan krim sa epi kapote sistèm lan».
Madan Moïse te pwofite poul choute sou la jistis an Ayiti nan kad ankèt jidisyè a li estime k ap dòmi jiska jodia menm kan gen kèk arestasyon ki fèt sou teritwa a ak nan peyi blan epi nominasyon yon senkyèm jij enstriksyon pou ankete sou dosye asasina a. Li bon poun raple 7 jiyè ap konje sou tout teritwa a.
