Nou pap konplis felisite minis zafè etranjè a Dominique Dupuy pou desizyon li pran pou raple 50 % pèsonèl diplomatik la, yon desizyon anpil moun tap tann sitou ak Gouvènman Garry conille ki deside fè batay kont koripsyon yon gwo priyorite.
Sepandan Nou pap konplis di yo pa konprann desizyon kabinè minis la pran pou mande koudèkont mennen ankèt administratif nan misyon diplomatik ak konsilè ayiti yo soti 1 oktòb 2021 rive 30 jen 2024 sèlman.
Nan Nòt sa a NPK di yo kore odit finansye administratif nan enstitsyon sa a men yo paka konprann pou Minis la mande Koudèkont ankete sèlman sou kèk rapò ansyen pandanl kite dèyè dènye rapò Wolf Dubic la, ki se enspektè jeneral anbasad ak konsila yo.
Pou fini Nou pap konplis mande Minis Dominique Dupuy resezil, korije fo pa sa sinon lap pase kòm yon moun kap pwoteje yon klan politik pandan lap antere yon lòt, sa riske sal imaj li kòm yon pèsonalite sosyete a tap voye flè pou li nan mwa pase yo.
Nap sinyale, sanl poko rann piblik anpil sous deja pataje kèk enfòmasyon sou rapò Wolf Dubic la ki se yon dokiman tèt chaje ,yon ankèt ki pwouve ak anpil prèv fason lajan kòb Paspò a tap gagote nan diplomasi a .
Nap raple depi lèl rive nan tèt MAE a, Dominique Dupuy deja raple plizyè diplomat ki gen non yo site nan koripsyon ki tap taye banda nan diplomasi ayisyen an akoz relasyon yo ak sèten ansyen palmantè, ansyen premye minis ak ansyen minis zafè etranjè epòk la.
