Chèk anseyan pou mwa mas la peye nan 10 depatman yo/Pwofesè titilè ak estajyè mobilize pou kou konpansasyon aprantisaj akselere
Ministè Edikasyon Nasyonal ak Fòmasyon Pwofesyonèl (MENFP) fè piblik la konnen chèk anyeyan yo pou mwa mas la peye e distribye nan 10 depatman yo. Yon lòt kote, MENFP enfòme elèv ki nan klas egzamen ofisyèl 9yèm ane fondamantal ak 4yèm ane segondè, li pral lanse kou konpansasyon aprantisaj akselere, apati madi 2 me nan plizyè lekòl Leta.
Plis pase 700 pwofesè titilè ak estajyè pral mobilize pou sipòte elèv lise ak lekòl fondamantal yo, ki kandida pou egzamen Leta, ane sa a. Aktivite sila a se yon sipò MENFP te prevwa, an akò ak angajman li te pran, nan lide pou konble mankman ki genyen nan aprantisaj kay elèv yo, akòz pwoblèm vylolans ak lòt nan lekòl ki nan zòn difisil yo. Konsa, MENFP ap pote bourad pa li bay elèv yo pou ede yo reyisi nan egzamen Leta yo e sove ane akademik sa a ki difisil anpil.
Anons sa a, se Minis Edikasyon Nasyonal, Pwofesè Nesmy MANIGAT, ki te fè l pandan yon konferans pou laprès ministè a te bay nan jounen, mèkredi 26 avril 2023 a, sou kesyon resansman lekòl yo ak enskripsyon anliy kandida yo pou egzamen 9yèm ane fondamantal yo.
Minis MANIGAT mande tout direktè lekòl, ki an reta yo, pou yo fè deklarasyon lekòl pa yo, prese prese, operasyon resansman an ap fini vandredi 28 avril 2023. Deklarasyon lekòl la anliy, se yon obligasyon pou l ka enskri kandida pou egzamen 9yèm ane yo, ki ap fèt tou anliy pa direktè ki konsène yo.
Sou kesyon grèv pwofesè yo ki afekte kèk lekòl Leta, Minis MANIGAT di pwofesè yo gen dwa pou fè grèv. Men, elèv k ap mande pwofesè nan sal klas yo, gen dwa tou pou yo jwenn kou yo pou yo pa pèdi ane lekòl sa a ki difisil anpil, e se devwa Leta pou ede nan sa a.
Konsa, Minis MANIGA kwè li enpòtan” 10 semèn anvan ane lekòl la femen e òganizasyon egzamen Leta yo, pou bay elèv yo tout sipò ki nesesè pou yo jwenn kou regilye nan lekòl yo, pou yo ka reyisi nan egzamen Leta yo”. Li pwofite presize Leta deja peye salè anseyan pou mwa mas la nan 10 depatman yo.
Sou kesyon kou konpansasyon aprantisaj akselere yo ki pral lanse yo, MENFP ap itilize sipò Radyo Edikativ, ak frekans 102.1 an, pou difizyon kou sila yo tankou lane pase. Gen lòt estasyon radyo ak televizyon nan peyi a, ki ka itilize tou pou bay sipò nan difize kou sa yo.
Biwo kominikasyon/MENFP
