Nan yon kominike pou Laprès, Ministè Edikasyon Nasyonal ak Fòmasyon Pwofesyonèl (MENFP) fè yon anons chòk konsènan sistèm edikasyon an nan peyi Dayiti ki kapab pran yon gwo kou nan jou sa yo. Ministè fè konnen gen posibilite pou anpil elèv ak anseyan pèdi dosye yo poutèt atak gang yo lanse nan rejyon metwopmolitèn Pòtoprens la, kote bandi ak zam yo vandalize plizyè lekòl ak biwo Ministè a ki ta toujou sou kontwòl bandi yo. Se MENFP pase nouvèl sa nan yon kominike ki parèt vandredi 8 mas 2024 la.
Seri atak nèg ak zam yo yo kont pouvwa Ariel Henry a ka kite gwo domaj ki pap ka repare sitou nan sistèm eskolè a. Tankou, si achiv eskolè a disparèt, anpil elèv p ap ka jwenn relve nòt yo, yo p ap ka jwenn diplòm yo tou. Se menm koze a tou pou pou anseyan yo ki pral gen difikilte nan karyè yo, si yo pa ta ka pwouve papye yo batay pandan lontan pou yo genyen yo. Se dosye ki grav anpil si n kwè kominike MENFP a. Absans dokiman sa yo, kapab bloke koze edikasyon an nan peyi a ni pou elèv, ni pou anseyan ni pou pwofesyonèl yo tou.
Yon lòt kote, Ministè Edikasyon Nasyonal fè konnen se sèl yon pati nan done yo, MENFP ap gen chans sove. Se ta dosye ki te gentan rantre nan sistèm enfòmasyon ak jesyon edikasyon. Men, ekip Ministè a ap kontinye fè gwo jefò pou pwoteje tout entegralite dokiman sansib sa yo.
Nan sans sa, Ministè Edikasyon Nasyonal ak Fòmasyon Pwofesyonèl (MENFP) ap raple tout moun, lekòl yo se byen piblik yo ye. Yo pa nan kont ak pèsòn. Fòk nou pwoteje yo si n di n renmen peyi a.
Carl Henry Florant
