Bandi nan zòn Maryani kontinye ap taye banda nan antre Sid kapital Pòtoprens lan. Samdi 23 desanm 2023 a, malfra yo boule yon bulldozer Lapolis pandan ajan PNH yo t ap mennen yon operasyon pou deloje bandi nan zòn sila. Se responsab Syndicat National des Policiers Haïtiens (SYNAPOHA), Lionel Lazarre ki rapòte bay nouvèl la jounalis Lukson Saint-Vil.
Youn nan bulldozer lapolis konn itilize pou kraze kay bandi yo konn kache nan kad operasyon l yo boule nan zòn Maryani samdi pase a. Daprè Lionel Lazarre, se bandi k ap opere nan zòn nan ki pase materyèl sa anba dife. Kèk videyo ki t ap woule Sou rezo sosyal yo kote nou wè chèf gang ki kontwole zòn sila ki t ap frape lestomak li tankou se yon viktwa li ranpòte sou lapolis nasyonal.
N ap raple se pa premye gwo materyèl Lapolis pèdi nan kad operasyon l ap mennen, pou yo deloje bandi nan plizyè zòn anndan peyi a.
Carl Henry Florant
