Dapre done Òganizasyon Entènasyonal Migrasyon an (OIM), 4.463 moun te oblije kouri kite kay yo apre atak ak zam gang yo te fè nan Komin Gresye, sitou nan 1ye seksyon kominal Morne à Bateau, nan aswè 10 me pou louvri 11 me 2024 la.
Pami moun ki deplase kite kay yo, 92% al pran refij lòt kote nan depatman Lwès la, 4% nan Nip ak 3% nan Sid la, se sa OIM fè konnen.
Toujou daprè OIM, 73% nan nouvo moun sa yo ki deplase akoz ensekirite jwenn refij kay lòt fanmi akèy, gen 27% nan yo ki ale nan 7 sit ki la pou resevwa refijye, pami sit sa yo gen 4 ki nouvo sak 3 sit ki te deja egziste.
Li bon pou n remake, 4.463 moun sa yo ogmante lis byen long moun ki deja kouri kite kay yo akoz atak bandi ak zam yo nan divès komin nan depatman Lwès la, sitou rejyon metwopolitèn Pòtoprens lan.
