Akoz vyolans bandi san fwa ni lwa yo nan kapital la ak zòn ki antoure l yo depi de (2) semèn, plis pase 33 000 moun pran direksyon vil pwovens yo sitou Gran Sid la daprè yon rapò Òganizasyon Entènasyonal pou Migrasyon an (OIM) pibliye jodi vandredi 22 mas 2024 la.
Se atak bandi ak zam yo nan plizyè katye nan zòn metwopmolitèn lan ki pouse moun sa yo met van nan vwèl yo pou yo pa pase anba woulo konpresè malfra yo, si n kwè OIM. Zak vyolans sa yo te deklannche jedi 29 fevriye nan mitan jounen an. Konpatriyòt sa yo ki oblije kouri kite kay yo, pran wout vil pwovens pou yo. Men daprè Òganizasyon entènasyonal la nan rapò li a, pi fò nan yo pran direksyon Gran Sid la malgre tout risk wout nasyonal ki mennen nan zòn sa a gen ladann.
Pou rekòlte enfòmasyon sa yo, ajans OIM yo te mete yo tou prè bis ki asire trajè zòn sitwayen sa yo prale yo. Se konsa, soti 8 mas pou rive 20 mas pase a, OIM denonbre 33 333 moun ki kite depatman Lwès la pou ale tabli kò yo nan vil pwovens yo, sitou Gran Sid la. Zòn sa te deja resevwa plis pase 116 000 moun mwa pase a daprè OIM.
Òganizasyon entènasyonal la eksprime preyokipasyon l pou tout moun sa yo ki pral tabli nan zòn pwovens yo sitou zòn Sid la ki pa menm gen enfrastrikti pou sa. Moun sa yo pral bezwen resous pou yo jere lavi yo nan nouvo mond sa yo pral evolye yo pa konn pou jouk kilè.
Pandan tan sa bandi yo kontinye ap montre puisans yo nan anpil zòn nan depatman Lwès la. Chak semèn yo tante pran yon nouvo katye. Jou sa yo, sib la se komin Petyon Vil kote afwontman ti mesye Viv Ansanm yo pa sispann ak ajan Lapolis nasyonal la. N ap raple Nasyonzini te fè konnen plis pase 80% teritwa nasyonal ayisyen anba kontwòl bandi ak zam yo.
Carl Henry Florant
