Dimanch 21 avril 2024 la, plizyè zòn nan rejyon metwopmolitèn Pòtoprens la te konnen yon sitiyasyon tansyon. Nan Sant kapital la, sou wout Ayopò a, Anba Delma, Dèlma 17 ak 19 menm jan Lasalin ak wout Frè, gwo kout bal ki t ap chante te panike abitan zòn sa yo.
Bandi ki regwoupe nan kowalisyon Viv Ansanm yo montre yon lòt fwa dimanch 21 avril la yo p ap kanpe zak vyolans yo nan kapital Pòtoprens la ak katye ki pwòch li yo. Yon lòt fwa ankò gang ak zam yo te mete pye yo atè pou simen latwoublay nan plizyè katye.
Abitan nan katye Dèlma 17 ak 19, zòn Kafou Ayopò ak yon bon pati nan Sant vil Pòtoprens konfime se te gwo kout bal ki t ap chante nan mitan jounen an. Sitiyasyon sa te panike abitan yo anpil ki pa t sispann lanse SOS pou otorite polisyè yo.
Anpil lafimen t ap soti nan zòn vyadik la daprè kèk moun ki pa t rive idantifye ki sa k te pwovoke lafimen sa yo. Pou moman n ap ekri atik la (6è aprè midi), sitiyasyon an kalm nan nivo kafou Ayopò daprè yon sous redaksyon an rive kontakte.
Nou aprann plizyè sitwayen nan zòn anba Lali ak Bwa Vèna resevwa bal mawon pandan jounen sa a.
Evenman sa yo rive nan moman konsèy prezidansyèl al ap pare pou enstale nan palè nasyonal nan komansman semèn kap vini an, selon enfòmasyon nou ka fè konfyans.
Pandan tan sa Konsèy sekirite Nasyonzini an kontinye ap rankontre sou dosye Ayiti a. Demen lendi 22 avril la, pou yon lòt fwa Nasyonzini pral chita pale sou sa k ap pase nan peyi a. Chèf BINUH an Isabel Salvador ap gen pou pran lapawòl nan okazyon a.
Carl Henry Florant
