Direktris ekzekitif fon Nasyonzini pou ti moun yo (Unicef), Catherine Russell, konpare sitiyasyon Ayiti ak yon fim k ap rakonte fen mond la, dimanch 17 mas 2024 la. Li fè deklarasyon sa nan yon interview li bay chèn ameriken an CBS Agence France Presse.
Se tankou yon fim Hollywood k ap dewoule nan kapital Pòtoprens la depi kèk jou, men poutan nou nan bon reyalite a. Vyolans gang yo dènye jou yo mete tout sektè ajenou. Lekòl pa fonksyone nan prèske tout vil zòn metwopolitèn nan, menm jan ak transpò piblik la ki paralize. Mete sou sa, biwo Leta yo rete fèmen depi jou seri atak sa yo te lanse a, lari yo prèske vid nan anpil zòn.
Pou Russell, sitiyasyon Ayiti a ou ka konpare l ak Mad Max, yon fim aksyon ki chita sou lasyans melanje ak fiksyon. «Anpil anpil moun ap soufri grangou anpil ak malnitrisyon, epi nou pa ka pote èd pou yo». Se sa Catherine Russell deklare sou CBS pandan l t ap drese yon tablo nwa sou sa pèp ayisyen an ap travèse dènye jou sa yo.
Catherine Russell mande pou èd Nasyonzini yo rive nan peyi a byen rapid malgre piyaj ki fèt nan estòk yo te genyen nan pi gwo pò peyi a nan kapital Pòtoprens la. «Fòk nou pran kontwòl sitiyasyon an pou n ka fè èd yo antre», se sa li pèsiste pou l di avan l raple «tray peyi sa ap pase depi 15 lane Tranbleman tè, kolera, COVID…» Pou responsab Unicef la, se «sitiyasyon ki pi mal peyi a ap konnen depi 10 lane.»
Pandan tan sa, peyi ki di yo se zanmi Ayiti yo ap retire pèsonèl yo te gen nan anbasad yo nan peyi a menm jan ak resòtisan yo. Yo itilize elikoptè pou transpòtè moun yo nan peyi Repiblik dominiken. Yon lòt kote, yo Kontinye ap fè reyinyon sou do Ayiti.
Carl Henry Florant
