Nan yon mesaj li adresse ak nasyon an mèkredi 17 jiyè 2024 la , Premye minis Garry Conille anonse anpil gwo desizyon pou retabli lapè ak sekirite nan tout peyi a.
Nan mesaj sa li adrese ak nasyon an ki dire apeprè 11 minit, chèf gouvènman an mete aksan sou konsekans negatif ensekirite a sou kondisyon sosyo-ekonomik popilasyon an. «Sitiyasyon tèt chaje sa a mande aksyon imedya ak desizif. Popilasyon an pa dwe pran an otaj pa bandi ankò, ni nan Pòtoprens, ni nan Latibonit oswa nan nenpòt lòt rejyon nan peyi a,» daprè chèf primati a.
«Ofisyèl leta yo deklare yon eta ijans sekirite nan tout katye bandi yo kontwole. Sa pral pèmèt gouvènman an aji pou detekte gang yo epi retabli otorite leta a,» se sa Garry Conille anonse. Li ensiste pou l fè konnen gen 14 komin nan depatman lwès ak Latibonit ki konsène pa mezi sa.
Pi devant Dr Garry Conille te pwofite mande jounalis pou evite kouvri operasyon, reyalize repòtaj pandan operasyon yo, yon fason pou yo pa kominike enfòmasyon estratejik sou operasyon fòs lòd yo.
Yon lòt bò, Garry Conille di li bay lapolis enstriksyon pou lanse operasyon ak sipò fòs kenyan nan lide pou reprann kontwòl tout teritwa nan peyi a. Li mande popilasyon an pou koulabore ak jan lòd yo.
Nap raple nan menm jounen mèkredi sa, ofisye polis kenyan ak polisye ayisyen te deplwaye nan divès ri nan kapital la epi twoke anpil kout zam ak bandi san fwa ni lwa kap taye banda depi kèk tan andedan peyi a.
